ទេសចរណ៍អន្តរជាតិត្រូវខាតបង់ចំណូលពី៩១០-១២០០ពាន់លានដុល្លារនិងមនុស្ស១០០-១២០លាននាក់អត់ការងារធ្វើ
ចំនួនភ្ញៀវទេសចរជុំវិញពិភពលោក នឹងត្រូវធ្លាក់ចុះចាប់ពី ៦០-៨០ ភាគរយ នៅឆ្នាំ ២០២០ នេះ ដោយសារការរាតត្បាតវីរុសកូវីដ ១៩។ នេះបើតាមការបញ្ជាក់ពីអង្គការទេសចរណ៍ពិភពលោក កាលពីថ្ងៃព្រហស្បត្តិ៍ ដែលតួលេខថ្មីនេះ គឺខ្ពស់ជាងការព្យាករណ៍មុនៗ ដោយថែមទាំងព្រមានថា បើសិនជាអូសបន្លាយកាន់តែយូរ ទឹកប្រាក់ខ្ទង់ទ្រីលានដុល្លារ ការងារខ្ទង់រយលានកន្លែងក្នុងវិស័យនេះ នឹងត្រូវបាត់បង់។ត្រីមាសទី១ ឆ្នាំ២០២០ ចំនួនភ្ញៀវទេសចរណ៍សរុបរបស់ពិភពលោក បានធ្លាក់ចុះដល់ទី ២២% ខណៈត្រឹមខែមីនាតែឯង គឺធ្លាក់ចុះ ៥៧% ដោយតំបន់រងប៉ះពាល់លឿនបំផុត មានទ្វីបអាស៊ី អឺរ៉ុប តែម្តង។ នេះជាការអះអាងរបស់អង្គការទេសចរណ៍ពិភពលោក មានមូលដ្ឋានក្នុងទីក្រុងម៉ាទ្រីត ប្រទេសអេស្ប៉ាញ។វិធានការរឹតត្បិតការធ្វើដំណើរ និងបើកទាំងព្រំដែនអាកាស ព្រំគោក និងទឹក នៃបណ្តាប្រជាជាតិជាច្រើនជុំវិញពិភពលោក ដើម្បីទប់ស្កាត់ការរាតត្បាតកូវីដ ១៩ បានធ្វើឲ្យវិស័យទេសចរណ៍អន្តរជាតិ ធ្លាក់ក្នុងឱនភាពយ៉ាងធ្ងន់ធ្ងរមិនធ្លាប់មានចាប់តាំងពីឆ្នាំ ១៩៥០ មក។ នេះបើសេចក្តីថ្លែងការណ៍របស់អង្គការសហប្រជាជាតិ។ក្រុមហ៊ុនអាកាសចរណ៍ បានរងគ្រោះធ្ងន់ធ្ងរចាប់តាំងពីមានការផ្ទុះរាតត្បាតក្នុងប្រទេសចិន ចុងឆ្នាំ ២០១៩ មកម៉្លេះ ធ្វើឲ្យជើងហោះហើរជាច្រើនត្រូវជាប់គាំង ខណៈវិស័យសណ្ឋាគារ បដិសណ្ឋារកិច្ច នាវាទេសចរណ៍ និងប្រតិបត្តិករទេសចរណ៍ កំពុងឈានដល់ការដួលរលំដោយសារវិបត្តិនៅពេលនេះ។លោក Zurab Pololikashvili អគ្គលេខាធិការនៃអង្គការទេសចរណ៍ពិភពលោក លើកឡើងថា ពិភពលោកពេលនេះ កំពុងប្រឈមមុខវិបត្តិសេដ្ឋកិច្ច និងសុខភាពធ្ងន់ធ្ងរបំផុត។ វិស័យទេសចរណ៍ ក៏កំពុងប៉ះពាល់យ៉ាងធ្ងន់ធ្ងរ ប៉ះពាល់ដល់ការងាររាប់លាន ពិសេសក្រុមប្រតិបត្តិករទេសចរណ៍ដែលពឹងផ្អែកសេដ្ឋកិច្ចទាំងស្រុងពីវិស័យនេះ។អង្គការទេសចរណ៍ដែលជ្រកក្រោយអង្គការសហប្រជាជាតិមួយនេះ ធ្លាប់បានព្យាករថា កំណើនវិស័យទេសចរណ៍អន្តរជាតិ ឆ្នាំ ២០២០ អាចកើនប្រមាណ ៣-៤ ភាគរយ ប៉ុន្តែការព្យាករណ៍នេះ ត្រួវការកែតម្រូវជាថ្មីកាលពីចុងខែមីនា ដោយបញ្ជាក់ពីឱនភាពប្រទេស ២០-៣០ ភាគរយ។ប៉ុន្តែបើមើលស្ថានភាពជាក់ស្តែងនៅពេលនេះ បើការរឹតបន្តឹងធ្វើដំណើរអូសបន្លាយដល់ដើមខែកក្កដា វិស័យទេសចរណ៍អន្តរជាតិនឹងបន្តធ្លាក់ដល់ទៅ ៥៨% មិនខាន ហើយបើការបិទព្រំដែន និងរឹតត្បិតលើការធ្វើដំណើរបន្តដល់ដើមខែធ្នូ វិស័យទេសចរណ៍អន្តរជាតិ នឹងធ្លាក់ដល់ ៧៨% ខណៈបើត្រឹមខែកញ្ញានោះ អាចធ្លាក់មកនៅត្រឹម ៧០% ប៉ុណ្ណោះ។ក្រោយស្ថានភាពនេះ វិស័យទេសចរណ៍អន្តរជាតិ នឹងត្រូវខាតបង់ចំណូលប្រមាណ ៩១០-១២០០ ពាន់លានដុល្លារ នឹងការងារក្នុងវិស័យទេសចរណ៍ប្រមាណ ១០០-១២០ លានកន្លែង ក៏ត្រូវបាត់បង់ដូចគ្នា៕ដោយPP
